اسلام آباد:
اسلام آباد ہائی کورٹ نے بدھ کے روز ایک شہری کی بازیابی کے بعد اُس کی گمشدگی سے متعلق دائر درخواست کو نمٹا دیا۔
جسٹس انعام امین منہاس نے شہری شرافت کی جانب سے اپنے بھائی محمد اشرف کی گمشدگی کے خلاف دائر درخواست کی سماعت کی۔
پولیس کی جانب سے عدالت میں جمع کروائی گئی رپورٹ میں بتایا گیا کہ محمد اشرف کے خلاف سیکریٹریٹ تھانے میں ڈکیتی کا مقدمہ درج ہے، اور اُسے 23 مئی کو ٹرائل کورٹ نے جیل بھیج دیا تھا۔
رپورٹ میں مزید کہا گیا کہ محمد اشرف کو بعد میں عدالت سے ضمانت بھی مل گئی تھی۔
عدالت نے لاپتہ شخص کی بازیابی کے بعد درخواست خارج کر دی۔
یاد رہے کہ مئی کے مہینے میں پشاور ہائی کورٹ کے چیف جسٹس نے حیات آباد سے پانچ لاپتہ افراد کی بازیابی سے متعلق درخواست پر فل بینچ تشکیل دیا تھا۔
درخواست میں مؤقف اختیار کیا گیا تھا کہ درخواست گزار کے پانچ قریبی رشتہ داروں کو پولیس نے حیات آباد میں واقع ان کے گھر سے حراست میں لیا، اور اُن کے بارے میں تاحال کوئی اطلاع نہیں مل سکی۔
