اسلام آباد، 26 ستمبر 2025 — پاکستان اور انٹرنیشنل مانیٹری فنڈ (آئی ایم ایف) کے درمیان قرضہ پروگرام کے دوسرے جائزہ مذاکرات میں عالمی ادارے نے ایک نئی شرط پیش کی ہے، جس کے تحت ایف بی آر کے زیر التواء مقدمات کو فوری طور پر نمٹانے پر زور دیا گیا ہے۔
ذرائع کے مطابق مذاکرات کے دوران پاکستان کی معاشی ٹیم نے آئی ایم ایف وفد کو ٹیکس ہدف پورا نہ کرنے اور محصولات میں کمی کی وجوہات پر تفصیلی بریفنگ دی۔ ایف بی آر حکام نے بتایا کہ سپر ٹیکس سے متعلق مقدمات کے فیصلے ہونے کی صورت میں تقریباً 200 ارب روپے قومی خزانے میں آسکتے ہیں۔
محصولات کی کمی کو پورا کرنے کے لیے ایف بی آر نے نفاذی اقدامات اور ان مقدمات کے فیصلے کروانے کا منصوبہ بھی پیش کیا۔ حکام نے مزید بتایا کہ حالیہ سیلاب کے باعث تقریباً 60 ارب روپے کے ٹیکس نقصانات کا ابتدائی تخمینہ لگایا گیا ہے۔ اس پر ایف بی آر نے ٹیکس ہدف میں رعایت کی درخواست کی، تاہم آئی ایم ایف وفد نے فوری طور پر کوئی جواب نہیں دیا۔
اندرونی ذرائع کے مطابق اگر عدالتوں کے فیصلے ایف بی آر کے حق میں نہ آئے تو حکومت کو تقریباً 200 ارب روپے کے اضافی اقدامات کرنا پڑ سکتے ہیں تاکہ خسارہ پورا ہو سکے۔
مذاکرات میں نئے این ایف سی ایوارڈ پر بھی بات ہوئی، جس میں تجویز دی گئی کہ صوبوں کے لیے آبادی کی بنیاد پر محصولات کا موجودہ 82 فیصد کوٹہ کم کرنے پر غور کیا جا رہا ہے۔ اس کے ساتھ ہی گزشتہ مالی سال کی کارکردگی پر بھی وفد کو آگاہ کیا گیا۔
وزارت خزانہ کے ذرائع کے مطابق آج کے اجلاس میں توانائی کے شعبے پر بھی تفصیلی گفتگو ہوگی۔ حکام کا کہنا ہے کہ انہیں مذاکرات کی کامیابی کے حوالے سے امید ہے اور توقع ہے کہ یہ عمل مثبت سمت میں آگے بڑھے گا۔
