کراچی — اورنگی ٹاؤن پولیس نے ایک شخص کو گرفتار کر لیا ہے جس پر الزام ہے کہ اس نے اپنے سابق داماد کو مبینہ طور پر غیرت کے نام پر قتل کر دیا۔
پولیس کے مطابق یہ واقعہ جمعرات کی رات پیش آیا جس میں ایک شخص جاں بحق اور چھ افراد زخمی ہوئے۔ مرکزی ملزم انور کو فائرنگ کے کچھ ہی دیر بعد گرفتار کر لیا گیا، جبکہ تھانہ اورنگی ٹاؤن میں اس کے خلاف قتل اور اقدامِ قتل کی دفعات کے تحت مقدمہ درج کر لیا گیا ہے۔
جاں بحق ہونے والا شخص احسن تھا، جس کی شادی انور کی بیٹی مصباح سے ہوئی تھی، تاہم دو ماہ قبل دونوں کے درمیان طلاق ہو گئی تھی۔ طلاق کے باوجود احسن اکثر اپنی سابقہ بیوی کے گھر آتا جاتا تھا۔ واقعے کے روز بھی وہ اپنے دوست سعد کے ہمراہ مصباح کے گھر موجود تھا کہ رات تقریباً دس بجے ملزم انور نے فائرنگ کر دی۔
فائرنگ کے نتیجے میں احسن موقع پر ہی دم توڑ گیا جبکہ سعد، مصباح اور دیگر افراد زخمی ہو گئے۔ پولیس کا کہنا ہے کہ ابتدائی تحقیقات کے مطابق یہ واقعہ غیرت کے نام پر پیش آیا، تاہم مزید تفتیش جاری ہے۔
اہلکاروں نے تصدیق کی ہے کہ واردات میں استعمال ہونے والا ہتھیار برآمد کر لیا گیا ہے اور زخمیوں کے بیانات قلمبند کیے جا رہے ہیں۔
