پنجاب کے بڑے دریا بدستور شدید سیلابی صورتحال سے دوچار ہیں، جب کہ فلڈ فورکاسٹنگ ڈویژن کی رپورٹ کے مطابق دریا چناب اور دریا راوی کے اہم مقامات پر ’’انتہائی اونچے‘‘ سیلابی ریلے گزر رہے ہیں۔
محکمہ کے دوپہر 2 بجے تک کے تازہ اعداد و شمار کے مطابق، چنیوٹ ہیڈ ورکس (چناب پر) اور بالوکی و سدھنائی (راوی پر) مسلسل دباؤ میں ہیں۔ بالوکی کے مقام پر پانی کا اخراج مزید بڑھ رہا ہے، تاہم سدھنائی کے مقام پر اس میں معمولی کمی ریکارڈ کی گئی۔
اسی دوران، پنجند ہیڈ ورکس — جہاں ستلج دریا چناب میں شامل ہوتا ہے — ’’اونچے‘‘ درجے کے سیلاب سے دوچار ہے، جہاں پانی کا اخراج تین لاکھ کیوسک سے تجاوز کر گیا ہے۔
دوسری جانب، گنڈا سنگھ والا (ستلج پر) پر صورتحال نہایت سنگین ہے، جہاں ’’غیر معمولی اونچا‘‘ سیلاب برقرار ہے اور پانی کا بہاؤ تین لاکھ دس ہزار کیوسک سے زائد ریکارڈ کیا گیا۔ انتظامیہ صورتحال پر باریک بینی سے نظر رکھے ہوئے ہے، کیونکہ دریاؤں میں بڑے پیمانے پر آنے والے پانی کے ریلے قریبی اضلاع میں مزید تباہی کا باعث بننے کا خدشہ بڑھا رہے ہیں۔
