اسلام آباد (28 اگست 2025): پاکستان ٹیلی کمیونیکیشن اتھارٹی (پی ٹی اے) نے ایک بار پھر شہریوں کو خبردار کیا ہے کہ غیر ملکی سم کارڈز کی خرید و فروخت غیر قانونی ہے اور اس میں ملوث افراد کو سخت قانونی کارروائی اور بھاری سزاؤں کا سامنا کرنا پڑ سکتا ہے۔
ٹیلی کام ریگولیٹر کا کہنا ہے کہ غیر ملکی سمز کی خرید و فروخت نہ صرف ملکی قوانین کی خلاف ورزی ہے بلکہ اس سے عوام کی ذاتی معلومات بھی سنگین خطرات میں پڑ سکتی ہیں۔
پی ٹی اے کے مطابق بعض جرائم پیشہ عناصر چوری شدہ شناختی معلومات استعمال کرکے شہریوں کے نام پر غیر قانونی سمز حاصل کرتے ہیں۔ یہ سمز بعد میں دھوکہ دہی، فراڈ اور بعض صورتوں میں دہشت گردانہ سرگرمیوں تک میں استعمال کی جاتی ہیں۔
شہریوں کے تحفظ کے لیے پی ٹی اے نے ایک آسان طریقہ متعارف کرایا ہے جس کے تحت ہر شخص یہ جانچ سکتا ہے کہ اس کے نام پر کتنی سمز رجسٹرڈ ہیں۔ اس مقصد کے لیے ویب سائٹ cnic.sims.pk وزٹ کی جا سکتی ہے یا قومی شناختی کارڈ نمبر ایس ایم ایس کے ذریعے 668 پر بھیجا جا سکتا ہے۔ کسی بھی غیر متعلقہ یا غیر استعمال شدہ سم کو فوری طور پر بلاک کرنے کی ہدایت کی گئی ہے۔
اتھارٹی نے شہریوں پر زور دیا ہے کہ نئی سم ہمیشہ صرف مجاز سیلز پوائنٹس، کسٹمر سروس سینٹرز یا موبائل کمپنیوں کے آفیشل فرنچائزز سے حاصل کریں اور تمام قانونی تقاضے مکمل کریں۔
پی ٹی اے کے مطابق ہوشیاری اور احتیاط ہی واحد راستہ ہے جس کے ذریعے عوام اپنی شناختی معلومات کو چوری، مالیاتی دھوکہ دہی اور غیر قانونی سمز کے باعث ہونے والے قانونی مسائل سے محفوظ رکھ سکتے ہیں۔
