لاہور، 10 ستمبر 2025:
قدرتی آفات کے دوران ریسکیو اور ریلیف آپریشن کو مؤثر بنانے کے لیے پنجاب حکومت نے ایک انقلابی قدم اٹھاتے ہوئے ایئرلفٹ ڈرون سروس متعارف کرا دی ہے، جو سیلاب میں پھنسے افراد کو محفوظ مقامات تک پہنچانے میں مدد دے گی۔
یہ جدید ڈرون 200 کلوگرام وزنی شخص کو محفوظ طریقے سے منتقل کرنے کی صلاحیت رکھتا ہے۔ پنجاب ہوم سیکریٹری کی ہدایت پر پہلا ڈرون ملتان بھیجا جا رہا ہے، جہاں حالیہ بارشوں اور سیلاب کے باعث متعدد لوگ محصور ہیں۔ یہ پاکستان میں انسانی ہمدردی کی بنیاد پر پہلی مرتبہ ایسا جدید ریسکیو ٹیکنالوجی استعمال کی جا رہی ہے۔
تعیناتی سے قبل سول ڈیفنس نے ڈرون کی کامیاب آزمائشی پروازیں کیں، جن کی ویڈیو پنجاب حکومت کے آفیشل ایکس اکاؤنٹ پر جاری کی گئی۔ فوٹیج میں دکھایا گیا کہ ڈرون کس طرح مشکل حالات میں بھی پھنسے ہوئے افراد کو بحفاظت نکال کر محفوظ مقامات تک پہنچا سکتا ہے۔
حکام نے تصدیق کی ہے کہ صوبائی حکومت سول ڈیفنس کے لیے مزید 10 ایئرلفٹ ڈرونز خریدنے کا فیصلہ کر چکی ہے، جس کے بعد پاکستان کی تاریخ میں پہلی ایمرجنسی ایئرلفٹ ڈرون سروس قائم ہو جائے گی۔
اس موقع پر پنجاب ہوم سیکریٹری نے کہا کہ حکومت سول ڈیفنس ریزیلینس کور کو جدید خطوط پر استوار کر رہی ہے۔ انہوں نے سول ڈیفنس کے عملے اور رضاکاروں کو "سیلاب اور ہنگامی حالات کے محاذ پر اصل سپاہی” قرار دیتے ہوئے ان کی خدمات کو سراہا اور کہا کہ ان کی فوری کارروائیاں بے شمار قیمتی جانیں بچا رہی ہیں۔
ماہرین کا کہنا ہے کہ بڑھتی ہوئی ماحولیاتی تبدیلیوں کے باعث صوبے کو بار بار اور شدید سیلاب کا سامنا کرنا پڑ رہا ہے، ایسے میں ایئرلفٹ ڈرون کی شمولیت ریسکیو سسٹم کے لیے ایک نیا سنگ میل ثابت ہو سکتی ہے۔
