اسلام آباد: پاکستان اپنے دریافت شدہ تیل کے ذخائر تیزی سے ختم کر رہا ہے، اور ماہرین نے خبردار کیا ہے کہ توانائی کے طویل مدتی تحفظ کے لیے نئی دریافتیں اب ناگزیر ہو چکی ہیں۔
آڈیٹر جنرل آف پاکستان کی رپورٹ کے مطابق ملک میں اب تک 1,234 ملین بیرل تیل کے ذخائر دریافت ہو چکے ہیں جن میں سے تقریباً 80 فیصد پہلے ہی استعمال ہو چکے ہیں۔ صوبائی اعدادوشمار کے مطابق خیبر پختونخوا کے پاس سب سے زیادہ 94.24 ملین بیرل ذخائر موجود ہیں، سندھ میں 78.98 ملین بیرل، پنجاب میں 74.23 ملین بیرل جبکہ بلوچستان کے پاس صرف 1.6 ملین بیرل ذخائر باقی ہیں۔
اس وقت ملک کی یومیہ پیداوار تقریباً 60 ہزار بیرل ہے، تاہم ماہرین کا کہنا ہے کہ اگر نئے ذخائر تلاش کر لیے جائیں تو اس میں نمایاں اضافہ کیا جا سکتا ہے۔ اس مقصد کے لیے اسپیشل انویسٹمنٹ فسیلیٹیشن کونسل (SIFC) نے بین الاقوامی کمپنیوں کو متوجہ کرنے کی کوششیں تیز کر دی ہیں تاکہ نئی دریافتوں کے عمل کو تیز کیا جا سکے۔
اگرچہ دریافت شدہ ذخائر تیزی سے کم ہو رہے ہیں، لیکن امریکی ادارہ برائے توانائی (EIA) کے اندازے کے مطابق پاکستان کے پاس اب بھی 9.1 ارب بیرل غیر دریافت شدہ تیل کے ذخائر موجود ہیں۔ تاہم خدشہ ہے کہ ملک کی توانائی کی طلب 2030 تک 2.23 ارب بیرل سے بڑھ کر 3.35 ارب بیرل تک پہنچ جائے گی، جس سے فوری طور پر نئی دریافتوں کی ضرورت اور بھی بڑھ گئی ہے۔
حکام کا کہنا ہے کہ اگر عالمی کمپنیوں کی شراکت سے نئے ذخائر بروئے کار لائے گئے تو یہ پاکستان کی معیشت کے لیے ایک گیم چینجر ثابت ہو سکتا ہے، جس سے درآمدی انحصار کم ہوگا، توانائی کے وسائل مستحکم ہوں گے اور قومی آمدنی میں اضافہ ممکن ہوگا۔
اسی دوران ایک خوش آئند خبر سامنے آئی ہے کہ آئل اینڈ گیس ڈیولپمنٹ کمپنی لمیٹڈ (OGDCL) نے سندھ کے ٹنڈو الہ یار میں چکرن-1 نامی ایک نئے کنویں سے تیل کی دریافت کا اعلان کیا ہے۔ کمپنی کے مطابق 2 جون 2025 کو کھدائی شروع کی گئی جو 1,926 میٹر گہرائی تک پہنچی اور اس کے بعد کیے گئے ٹیسٹ سے یومیہ 275 بیرل تیل کی پیداوار سامنے آئی۔ OGDCL، جو اس منصوبے میں 95 فیصد شراکت رکھتی ہے، نے اسے ملکی پیداوار میں اضافے کی جانب ایک مثبت قدم قرار دیا ہے۔ ماہرین کے مطابق اگر اس طرح کی دریافتوں کو بھرپور انداز میں آگے بڑھایا جائے تو مستقبل میں تیل کی کمی کو کسی حد تک پورا کیا جا سکتا ہے اور پاکستان کو درآمدی ایندھن پر بھاری انحصار سے بچایا جا سکتا ہے
