کراچی (11 ستمبر 2025):
جناح اسپتال کراچی کے ماہر ڈاکٹروں نے ایک بڑی طبی کامیابی حاصل کرتے ہوئے کینسر کے مریض پر پہلا مصنوعی گھٹنے کا آپریشن کامیابی سے مکمل کر لیا۔ اس نایاب آپریشن نے 26 سالہ نوجوان کو نئی زندگی عطا کر دی۔
اسپتال حکام کے مطابق یہ پیچیدہ سرجری چار گھنٹے تک جاری رہی اور اگرچہ اس کی کُل لاگت ساڑھے تین کروڑ روپے بنتی ہے، مگر اسے مکمل طور پر مفت انجام دیا گیا۔ جناح اسپتال کی تاریخ میں پہلی بار کینسر کے مریض کو مصنوعی گھٹنا لگایا گیا، جو سرکاری علاج کے شعبے میں ایک سنگ میل قرار دیا جا رہا ہے۔
آپریشن کرنے والی ٹیم کے سربراہ ڈاکٹر فاروق نے بتایا کہ مریض کے گھٹنے اور پاؤں کے نیچے کینسر پھیل گیا تھا۔ آپریشن کے بعد مریض کے تمام ٹیسٹ نارمل آئے اور جسم سے کینسر کا اثر ختم ہوگیا۔ ڈاکٹر فاروق کا کہنا تھا: “یہ نوجوان زندگی اور موت کی کشمکش میں تھا، لیکن کامیاب آپریشن کے بعد اب اس کے سامنے ایک نیا مستقبل ہے۔”
سرجری ٹیم میں ڈاکٹر مظفر، ڈاکٹر ولی، ڈاکٹر شاہد اور ڈاکٹر خوشحال شامل تھے، جبکہ پلاسٹک سرجری یونٹ کی جانب سے ڈاکٹر آغا وسیم، ڈاکٹر ماہک، ڈاکٹر کومل اور ڈاکٹر فاروق نے حصہ لیا۔
ڈاکٹر فاروق کے مطابق مصنوعی گھٹنے کی قیمت دس سے گیارہ لاکھ روپے تک ہوتی ہے، لیکن مریض کو یہ بالکل مفت فراہم کیا گیا۔ انہوں نے مزید بتایا کہ یہ جدید مصنوعی گھٹنا دنیا بھر میں استعمال کیا جاتا ہے اور 20 سے 25 سال تک مؤثر رہتا ہے۔
یہ کامیاب آپریشن نہ صرف مریض کی زندگی بچانے کا باعث بنا بلکہ جناح اسپتال میں کینسر کے علاج کے نئے در کھول دیے ہیں۔ ماہرین کے مطابق یہ اقدام اس بات کی علامت ہے کہ جدید اور مہنگے علاج اب ان مریضوں کے لیے بھی ممکن ہو رہے ہیں جو انہیں برداشت کرنے کی سکت نہیں رکھتے۔
