وزیراعظم شہباز شریف نے کہا ہے کہ پاکستان اور ترکی کے درمیان تعلقات باہمی احترام، بھائی چارے اور مخلص دوستی کی مضبوط بنیادوں پر قائم ہیں ایک ایسا رشتہ جو وقت کی ہر آزمائش پر پورا اترا ہے۔
اسلام آباد میں ترکی کے یومِ جمہوریہ کی تقریب سے خطاب کرتے ہوئے وزیراعظم نے کہا کہ پاکستان اور ترکی کا رشتہ محض سفارتی تعلق نہیں بلکہ دلوں کا ناتا ہے، جو مشترکہ تاریخ، اقدار اور قربانیوں سے جڑا ہوا ہے۔
انہوں نے کہا کہ ترکی نے ہمیشہ مشکل وقت میں پاکستان کا ساتھ دیا ہے، چاہے وہ جنگوں کا دور ہو، قدرتی آفات ہوں یا کسی قومی بحران کا وقت۔ “ہمارے مشکل ترین ادوار میں، خصوصاً بھارت کے ساتھ جنگوں کے دوران، ترکی ہمارے ساتھ چٹان کی طرح کھڑا رہا یہی ہے حقیقی بھائی چارہ،” وزیراعظم نے کہا۔
وزیراعظم شہباز شریف نے پاکستان میں حالیہ تباہ کن سیلابوں کے دوران ترک حکومت اور عوام کی بھرپور مدد اور ہمدردی کا ذکر کرتے ہوئے کہا کہ پاکستانی قوم ترکی کی اس محبت اور یکجہتی کو کبھی نہیں بھولے گی۔
انہوں نے کہا کہ آج پاکستان اور ترکی اپنے تعلقات کو معاشی، دفاعی اور تزویراتی شعبوں میں مزید مستحکم بنا رہے ہیں، اور دونوں ممالک کے درمیان تعاون وقت کے ساتھ ساتھ مزید مضبوط ہوتا جا رہا ہے۔
وزیراعظم نے اپنے حالیہ دورۂ ترکی اور ترک صدر رجب طیب ایردوان کے پاکستان کے دورے کا حوالہ دیتے ہوئے کہا کہ دونوں ممالک کی قیادت نے اس عزم کا اظہار کیا ہے کہ وہ “ایک دوسرے کے دکھ سکھ میں شریک رہیں گے” اور باہمی ترقی و خوشحالی کے لیے ساتھ مل کر کام کریں گے۔
شہباز شریف نے جدید ترکی کی تعریف کرتے ہوئے کہا کہ آج کا ترکی جدیدیت اور اپنی قدیم روایات و ثقافت کا حسین امتزاج ہے۔ “آج کا ترکی ترقی، ایمان اور تہذیب کی ایک شاندار مثال ہے جو نہ صرف ترک قوم بلکہ پوری مسلم دنیا کے لیے باعثِ فخر ہے،” وزیراعظم نے اپنے خطاب کے اختتام پر کہا۔
