ایوانس وِل، انڈیانا — پاکستان کے نوجوان گولفر عمر خالد حسین نے اتوار کے روز تاریخ رقم کرتے ہوئے وہ کارنامہ انجام دیا جس کا پاکستانی کھیلوں میں پہلے کوئی تصور بھی نہیں تھا۔ صرف 20 برس کی عمر میں انہوں نے امریکی سرزمین پر کسی گولف ٹائٹل کو جیتنے والے پہلے پاکستانی کھلاڑی کا اعزاز حاصل کر لیا۔ عمر نے مشہور فینڈرچ اوپن میں شاندار کارکردگی دکھاتے ہوئے امریکی پروفیشنل گولفر زیک ولیمز کو صرف ایک اسٹروک سے شکست دی۔
عمر، جو اس وقت امریکہ کی NCAA ڈویژن 1 (کالج اسپورٹس کی سب سے بڑی سطح) میں پاکستان کے واحد نمائندہ ہیں، نے بے پناہ اعصاب و ہمت کا مظاہرہ کرتے ہوئے پار-70 فینڈرچ گولف کورس پر دو روزہ کھیل میں 126 (-14) کا شاندار اسکور بنایا۔ انہوں نے مسلسل 61 اور 65 کے اسکور کھیل کر 18,700 ڈالر کے ایونٹ میں کئی تجربہ کار پروفیشنلز کو پیچھے چھوڑ دیا۔
کراچی میں پیدا ہونے والے عمر نے ہفتے کو پہلے راؤنڈ میں شاندار آغاز کیا، جب انہوں نے 9 انڈر پار 61 کا کارڈ کھیلتے ہوئے آٹھ برڈیز اور ایک ایگل بنائی۔ آخری روز وہ اگرچہ پہلے ہول پر بوگی کے ساتھ پھسلے، مگر فوراً سنبھل گئے اور چھ برڈیز کی مدد سے 65 کا اسکور بنا کر تاریخی فتح اپنے نام کرلی۔
یہ کامیابی عمر کے کیریئر میں ایک اور یادگار اضافہ ہے۔ محض 16 برس کی عمر میں وہ پاکستان ایمیچور چیمپئن شپ کے سب سے کم عمر فاتح بنے تھے۔ ایک سال بعد انہوں نے امریکہ میں یو ایس جی اے (United States Golf Association) کے ایونٹ میں کٹ کھیلنے والے پہلے پاکستانی ہونے کا اعزاز حاصل کیا، جب انہوں نے اوریگن کے مشہور بیندن ڈونز گولف کلب میں منعقدہ یو ایس جونئیر گولف چیمپئن شپ میں یہ کارنامہ انجام دیا۔ بعدازاں انہوں نے متعدد بین الاقوامی ایونٹس میں شاندار پوزیشنز حاصل کیں، جن میں 2024 کے قطر اوپن میں چوتھی پوزیشن بھی شامل ہے۔
عمر، جو 17 برس کی عمر میں پاکستان کے سب سے کم عمر نمبر ون گولفر بھی بنے، اب تک ملک کی نمائندگی ایشین گیمز، ایشیا پیسفک چیمپئن شپ اور ورلڈ چیمپئن شپ جیسے بڑے مقابلوں میں کر چکے ہیں، جبکہ وہ برٹش ایمیچور، اسکاٹش اوپن اور سینٹ اینڈریوز اوپن جیسے عالمی سطح کے ایونٹس میں بھی حصہ لے چکے ہیں۔
فتح کے بعد گفتگو کرتے ہوئے نوجوان گولفر نے اپنے خواب کو دہراتے ہوئے کہا:
"میں اپنی کارکردگی سے مطمئن ہوں اور محنت جاری رکھوں گا تاکہ اپنے خواب کو حقیقت بنا سکوں — پی جی اے ٹور پر کھیلنے اور جیتنے کا خواب۔”
پاکستان جیسے ملک میں، جہاں گولف ہمیشہ کھیلوں کے حاشیے پر رہا ہے، عمر خالد کی امریکی سرزمین پر یہ جیت نہ صرف ذاتی کامیابی ہے بلکہ پاکستانی گولف کے لیے ایک نئے دور کا آغاز بھی ہے۔
