اسپیس ایکس کی ذیلی کمپنی اسٹارلنک نے عالمی موبائل رابطے کے فروغ کے لیے اب تک کا سب سے بڑا ڈائریکٹ ٹو سیل سیٹلائٹ کنیکٹیوٹی معاہدہ جاز کی پیرنٹ کمپنی ویون (Veon) کے ساتھ طے کر لیا ہے۔ یہ بات رائٹرز کی ایک رپورٹ میں بتائی گئی۔
اس معاہدے کے تحت ویون اپنے موجودہ ٹیلی کام نیٹ ورکس میں اسٹارلنک کی سیٹلائٹ بیسڈ موبائل سروس کو شامل کرے گا۔ ابتدا میں یہ سروس قازقستان میں بی لائن اور یوکرین میں کیف اسٹار کے ذریعے فراہم کی جائے گی۔ چونکہ ویون پاکستان، بنگلہ دیش اور ازبکستان میں بھی کام کرتا ہے، اس لیے مستقبل میں اس توسیع کے مزید امکانات روشن ہیں۔
یہ شراکت غیر اختصاصی (nonexclusive) نوعیت کی ہے، یعنی ویون دیگر سیٹلائٹ کمپنیوں کے ساتھ بھی تعاون جاری رکھ سکتا ہے۔ ذرائع کے مطابق کمپنی ایمیزون کے پروجیکٹ کویپر (Project Kuiper)، AST اسپیس موبائل اور یوٹیل سیٹ ون ویب سے بھی ممکنہ معاہدوں پر بات کر رہی ہے۔
فی الحال اسٹارلنک دنیا بھر میں سات ملین سے زائد صارفین کو خدمات فراہم کر رہا ہے اور گیارہ ممالک میں مختلف ٹیلی کام آپریٹرز کے ساتھ اشتراک میں کام کر رہا ہے۔ اسپیس ایکس کے پاس آٹھ ہزار سے زیادہ سیٹلائٹس موجود ہیں جن میں سے تقریباً 650 سیٹلائٹس صرف ڈائریکٹ ٹو سیل سروس کے لیے مخصوص ہیں۔ یہ ٹیکنالوجی عام موبائل فونز کو براہِ راست سیٹلائٹ سے منسلک کرنے کی صلاحیت رکھتی ہے، بغیر کسی روایتی موبائل ٹاور کے۔
ماہرین کے مطابق یہ شراکت ٹیلی کام صنعت کے ایک نئے رجحان کو ظاہر کرتی ہے، جہاں سیٹلائٹ کمیونی کیشن کو مستقبل کی انٹرنیٹ فراہمی کا سب سے مؤثر ذریعہ سمجھا جا رہا ہے۔ بالخصوص وہ علاقے جہاں زمینی انفراسٹرکچر محدود ہے جیسے وسطی اور جنوبی ایشیا وہاں یہ ٹیکنالوجی انقلابی تبدیلی لا سکتی ہے۔
اگرچہ معاہدے کی مالی تفصیلات سامنے نہیں آئیں، تاہم ماہرین اسے اسٹارلنک کے لیے ایک بڑا سنگ میل قرار دے رہے ہیں، جو اب صرف براڈ بینڈ تک محدود نہیں بلکہ موبائل کنیکٹیوٹی کے شعبے میں بھی قدم جما رہا ہے ایک ایسا قدم جو دنیا بھر میں انٹرنیٹ کی رسائی کے انداز کو بدل سکتا ہے۔
