ڈپٹی وزیراعظم اور وزیر خارجہ اسحاق ڈار نے علما اور مذہبی اسکالرز پر زور دیا ہے کہ وہ مسلم امہ میں اتحاد اور یکجہتی کے فروغ کے لیے اپنا مؤثر اور قائدانہ کردار ادا کریں، کیونکہ آج کے دور میں امت کو درپیش چیلنجز کا مقابلہ صرف باہمی ہم آہنگی کے ذریعے ہی ممکن ہے۔
اسلام آباد میں پہلے بین الاقوامی قراءت مقابلے کی اختتامی تقریب سے خطاب کرتے ہوئے اسحاق ڈار کا کہنا تھا کہ ہر مسلم ملک کے پاس اپنی مخصوص صلاحیتیں اور قوتیں موجود ہیں، اور اگر ان اجتماعی صلاحیتوں کو یکجا کیا جائے تو مسلم امہ ایک ناقابلِ شکست قوت بن سکتی ہے۔
انہوں نے کہا کہ اسلام امن کا دین ہے اور ہر طرح کی دہشت گردی کو واضح طور پر رد کرتا ہے۔ اسحاق ڈار نے تمام مسلم ممالک پر زور دیا کہ وہ دہشت گردی کے مکمل خاتمے کے لیے ایک دوسرے کا ہاتھ مضبوط کریں، کیونکہ یہ اللہ تعالیٰ کا حکم بھی ہے۔
پاکستان میں دہشت گردی کی تازہ لہر کا ذکر کرتے ہوئے ڈپٹی وزیراعظم نے کہا کہ اگرچہ دہشت گردی ایک بار پھر سر اٹھا رہی ہے، لیکن پاکستان اس لعنت کے خاتمے کے لیے پہلے سے زیادہ پُرعزم اور ثابت قدم ہے۔
اس موقع پر انہوں نے وزارتِ مذہبی امور کی تعریف کی کہ جس نے بین الاقوامی قراءت مقابلہ منعقد کر کے مختلف مسلم ممالک کے قراء کو ایک پلیٹ فارم پر جمع کیا۔ ان کا کہنا تھا کہ آئندہ مقابلوں میں مزید ممالک کے قراء کو بھی مدعو کیا جانا چاہیے۔
نوجوان قراء سے خطاب کرتے ہوئے اسحاق ڈار نے انہیں قرآنِ کریم سے اپنے تعلق کو مزید مضبوط کرنے کی تلقین کی۔
تقریب کے اختتام پر انہوں نے تمام شریک ممالک کے مندوبین اور نمائندوں کا شکریہ ادا کیا اور کہا کہ ان کی آمد نے مسلم امہ کے مابین برادرانہ تعلقات اور باہمی اتحاد کو مزید مضبوط کیا ہے۔
