چلاس (یکم ستمبر 2025): گلگت بلتستان کے ضلع دیامر کے علاقے تھور میں پیر کے روز آرمی ایوی ایشن کا ایم آئی-17 ہیلی کاپٹر المناک حادثے کا شکار ہوگیا، جس کے نتیجے میں دو پائلٹس سمیت پانچ اہلکار شہید ہوگئے۔
سرکاری ترجمان فیض اللہ فراق کے مطابق ہیلی کاپٹر معمول کی تربیتی پرواز پر تھا جب ہُدار گاؤں کے قریب اچانک تکنیکی خرابی کے باعث گر کر تباہ ہوگیا۔ انہوں نے تصدیق کی کہ ہیلی کاپٹر میں دو پائلٹ اور تین ٹیکنیکل اسٹاف سوار تھے، بدقسمتی سے کوئی بھی زندہ نہ بچ سکا۔
آئی ایس پی آر نے شہداء کی شناخت پائلٹ اِن کمانڈ میجر عاطف، کو پائلٹ میجر فیصل، نائب صوبیدار فلائٹ انجینئر مقبول، کریو چیف حوالدار جہانگیر اور کریو چیف نائیک عامر کے طور پر کی ہے۔
اپنے بیان میں آئی ایس پی آر نے واضح کیا کہ تربیتی مشقیں آرمی ایوی ایشن کی معمول کی سرگرمیوں کا حصہ ہیں، تاکہ آپریشنل تیاری کے ساتھ ساتھ انسانی ہمدردی اور قدرتی آفات میں ریلیف آپریشنز کے لیے ہمہ وقت تیار رہا جا سکے۔
وزیر اعلیٰ گلگت بلتستان حاجی گلبر خان نے حادثے پر گہرے دکھ اور افسوس کا اظہار کیا اور ضلعی انتظامیہ کو فوری طور پر جائے حادثہ پہنچنے کی ہدایت دی۔ حکام کے مطابق کمانڈر ایف سی این اے، ڈی جی گلگت بلتستان اسکاؤٹس، کمشنر دیامر اور مقامی افسران بڑی تعداد میں عوام کے ساتھ موقع پر موجود تھے۔ تاحال آگ بجھانے اور ملبہ محفوظ بنانے کا کام جاری تھا۔
وزیر اعلیٰ نے چلاس اسپتال میں ایمرجنسی نافذ کر دی اور تمام ڈاکٹرز و طبی عملے کو ہدایت دی کہ اپنی حاضری یقینی بنائیں۔ ترجمان فیض اللہ فراق نے بتایا کہ یہ ہیلی کاپٹر وقتاً فوقتاً ریلیف آپریشنز میں بھی استعمال ہوتا رہا ہے۔ انہوں نے شہداء کو خراج عقیدت پیش کرتے ہوئے کہا، “مشکل کی ہر گھڑی میں یہ شاہین صفت جوان قوم کا قرض اپنے خون سے ادا کرتے ہیں۔”
یہ افسوسناک حادثہ ایک بار پھر گلگت بلتستان کے دشوار گزار پہاڑی علاقوں میں فضائی پروازوں کے خطرات کو نمایاں کرتا ہے، جہاں کٹھن جغرافیہ اور تکنیکی مسائل بارہا سلامتی کے خدشات کو جنم دیتے ہیں۔
