اسلام آباد: حکومت نے یوٹیلیٹی اسٹورز کارپوریشن کے ملازمین کے لیے 30 ارب روپے سے زائد مالیت کا بڑا ریلیف پیکیج منظور کر لیا ہے، جس کے تحت انہیں گولڈن ہینڈ شیک اسکیم کے تحت رضاکارانہ پنشن دی جائے گی۔
یہ فیصلہ اقتصادی رابطہ کمیٹی (ای سی سی) کے اجلاس میں کیا گیا، جس کی صدارت وفاقی وزیر خزانہ محمد اورنگزیب نے کی۔ وزارت خزانہ کے مطابق ای سی سی نے یوٹیلیٹی اسٹورز کارپوریشن کی بندش کے منصوبے کی منظوری دیتے ہوئے 30.2 ارب روپے مختص کیے ہیں، جو ملازمین کو رضاکارانہ ریٹائرمنٹ کے فوائد کی مد میں دیے جائیں گے۔ یہ پیکیج وزارت صنعت و پیداوار کی سفارش پر پیش کیا گیا تھا۔
منصوبے کے تحت کارپوریشن کے اثاثے موجودہ مالی سال کے دوران فروخت کیے جائیں گے، جبکہ ای سی سی نے ہدایت دی کہ اس عمل کو شفاف انداز میں مکمل کیا جائے تاکہ کسی قسم کی بے ضابطگی نہ ہو۔
یوٹیلیٹی اسٹورز سے متعلق فیصلے کے ساتھ ساتھ کابینہ کمیٹی برائے سرکاری ادارے نے نیسپاک کے بورڈ آف ڈائریکٹرز کی تشکیل نو کی بھی منظوری دی۔ نئے بورڈ میں شامل ارکان کے نام ہیں: جاوید اسلم، محمد علی، پیر سعد احسن الدین، عمر حسن اور شہانہ احمد علی۔
وزارت خزانہ کے مطابق ان امیدواروں کا انتخاب ان کی پیشہ ورانہ مہارت اور قابلیت کی بنیاد پر کیا گیا ہے، جبکہ کمیٹی نے ہدایت دی کہ نامزدگی کا عمل بروقت اور مربوط انداز میں مکمل کیا جائے۔
اجلاس میں وفاقی وزراء ریاض حسین پیرزادہ، جام کمال خان سمیت دیگر اعلیٰ حکام نے بھی شرکت کی۔
