کراچی — ٹریفک حادثات پر قابو پانے اور شہر میں نظم و ضبط قائم کرنے کے لیے کراچی کی ٹریفک پولیس نے تمام بڑی شاہراہوں پر نئی اسپیڈ لمٹس مقرر کر دی ہیں۔ یہ اقدام شہر کے ٹریفک نظام کو جدید خطوط پر استوار کرنے اور اس میں اسمارٹ نگرانی کے نظام متعارف کرانے کے منصوبے کا حصہ ہے۔
ڈی آئی جی ٹریفک پیر محمد شاہ کے مطابق، موٹر سائیکلوں اور لائٹ ٹرانسپورٹ گاڑیوں (LTVs) کے لیے زیادہ سے زیادہ رفتار 60 کلومیٹر فی گھنٹہ مقرر کی گئی ہے، جب کہ بھاری گاڑیوں (HTVs)جن میں بسیں اور ٹرک شامل ہیں — کو 30 کلومیٹر فی گھنٹہ سے زیادہ کی رفتار سے چلانے کی اجازت نہیں ہوگی۔ ان کا کہنا تھا کہ اس فیصلے کا مقصد سڑکوں پر نظم و ضبط لانا اور تیز رفتاری کے باعث بڑھتے حادثات میں کمی لانا ہے۔
نئی حدود پر عمل درآمد یقینی بنانے کے لیے شہر کے مختلف مقامات پر جدید اسپیڈ مانیٹرنگ کیمرے نصب کیے جا رہے ہیں، جو گاڑیوں کی رفتار خودکار طور پر چیک کر کے ای چالان جاری کریں گے۔ اس کے علاوہ، تقریباً 10 ہزار بھاری گاڑیوں میں جی پی ایس ٹریکرز لگائے جا رہے ہیں جو ٹریفک ریگولیشن اینڈ سٹیشن سسٹم (TRACS) سے منسلک ہوں گے تاکہ ان کی حقیقی وقت میں نگرانی کی جا سکے۔
اس وقت TRACS نظام کراچی کے تقریباً 40 فیصد حصے میں فعال ہے، جس میں شارع فیصل اور ضلع جنوبی کے کئی علاقے شامل ہیں۔ یہ نظام نہ صرف تیز رفتاری کی خلاف ورزی کو پکڑتا ہے بلکہ الٹی سمت میں ڈرائیونگ، سگنل توڑنے، ہیلمٹ یا سیٹ بیلٹ نہ پہننے جیسے دیگر جرائم کی نشاندہی بھی کرتا ہے۔
حکام کے مطابق، آئندہ سال کے آغاز تک اس نظام کو شہر کے صنعتی علاقوں سائٹ، لانڈھی، کورنگی اور نیو کراچی — تک توسیع دی جائے گی۔ عوام میں شعور بیدار کرنے کے لیے آٹھ نومبر سے ایک شہر گیر آگاہی مہم بھی شروع کی جا رہی ہے، جس میں ذمہ دارانہ ڈرائیونگ اور سڑکوں کی حفاظت کے بارے میں آگاہی دی جائے گی۔
ڈی آئی جی شاہ نے بتایا کہ کراچی کا جدید ٹریفک مینجمنٹ سسٹم 2026 تک مکمل طور پر فعال ہو جائے گا، جس کے بعد شہر میں ٹریفک کے بہاؤ میں بہتری، حادثات میں کمی اور قانون کا یکساں اطلاق یقینی بنایا جائے گا خواہ ڈرائیور کسی بھی طبقے یا حیثیت سے تعلق رکھتا ہو۔
