اسلام آباد — مالی سال 2025-26 کی ابتدائی دو ماہ کے دوران امریکا پاکستانی مصنوعات کا سب سے بڑا خریدار رہا، جس کے بعد برطانیہ اور چین بالترتیب دوسرے اور تیسرے نمبر پر رہے۔ یہ اعداد و شمار اسٹیٹ بینک آف پاکستان (ایس بی پی) کی جانب سے جاری کیے گئے ہیں۔
امریکا کو برآمدات جولائی تا اگست میں 1.11 ارب ڈالر رہیں، جو گزشتہ سال اسی عرصے میں 95 کروڑ ڈالر تھیں۔ اس طرح برآمدات میں 17 فیصد اضافہ ریکارڈ کیا گیا۔ برطانیہ کو برآمدات کی مالیت 38 کروڑ 51 لاکھ ڈالر رہی، جو پچھلے سال کے 36 کروڑ 63 لاکھ ڈالر کے مقابلے میں 5.1 فیصد زیادہ ہے۔
چین تیسرے نمبر پر رہا، جہاں برآمدات 35 کروڑ 45 لاکھ ڈالر رہیں، جو گزشتہ سال کے 32 کروڑ 34 لاکھ ڈالر سے زیادہ ہیں۔
دیگر اہم مارکیٹوں میں ملا جلا رجحان
روایتی طور پر اہم مارکیٹ متحدہ عرب امارات (یو اے ای) میں برآمدات کم ہوئیں۔ برآمدات 32 کروڑ 7 لاکھ ڈالر رہیں، جو گزشتہ سال کے 40 کروڑ ڈالر سے کم ہیں۔ اس کے برعکس جرمنی کو برآمدات بڑھ کر 30 کروڑ 57 لاکھ ڈالر ہو گئیں، جو پچھلے سال 28 کروڑ 72 لاکھ ڈالر تھیں۔
یورپی ممالک کے ساتھ تجارت میں ملا جلا رجحان رہا۔ نیدرلینڈز کو برآمدات 24 کروڑ 30 لاکھ ڈالر رہیں، جو پچھلے سال کے 24 کروڑ 73 لاکھ ڈالر سے کچھ کم ہیں۔ اٹلی کو برآمدات میں بہتری آئی اور یہ 21 کروڑ 55 لاکھ ڈالر تک پہنچ گئیں، جو گزشتہ سال 18 کروڑ 70 لاکھ ڈالر تھیں۔ اسی طرح اسپین کو برآمدات 24 کروڑ 22 لاکھ ڈالر رہیں، جو گزشتہ سال کے 23 کروڑ 19 لاکھ ڈالر سے زیادہ ہیں۔
علاقائی منڈیوں میں افغانستان کو برآمدات 10 کروڑ 93 لاکھ ڈالر رہیں، جو گزشتہ سال کے 14 کروڑ 66 لاکھ ڈالر سے نمایاں کمی ظاہر کرتی ہیں۔ بنگلہ دیش کو برآمدات بھی کچھ کم ہو کر 11 کروڑ 63 لاکھ ڈالر رہیں، جو پچھلے سال 12 کروڑ 20 لاکھ ڈالر تھیں۔
فرانس، بیلجیئم اور مشرق وسطیٰ کو برآمدات
فرانس کو جولائی۔اگست میں 8 کروڑ 85 لاکھ ڈالر کی برآمدات ہوئیں، جو گزشتہ سال کے 8 کروڑ 27 لاکھ ڈالر سے کچھ زیادہ ہیں۔ اس کے برعکس بیلجیئم کو برآمدات کم ہو کر 8 کروڑ 65 لاکھ ڈالر رہیں، جو پچھلے سال 10 کروڑ 4 لاکھ ڈالر تھیں۔
خلیجی ممالک میں سعودی عرب کو برآمدات 10 کروڑ 67 لاکھ ڈالر رہیں، جو گزشتہ سال کے 11 کروڑ 41 لاکھ ڈالر سے کم ہیں۔ ترکی کے ساتھ تجارت میں بھی نمایاں کمی دیکھنے میں آئی اور برآمدات گھٹ کر صرف 2 کروڑ 85 لاکھ ڈالر رہ گئیں، جو گزشتہ سال 6 کروڑ 48 لاکھ ڈالر تھیں۔
