نیویارک، 27 ستمبر 2025 — اقوام متحدہ کی جنرل اسمبلی کے اجلاس کے موقع پر ہونے والی ایک اہم سفارتی ملاقات میں پاکستان، روس، چین اور ایران کے وزرائے خارجہ نے افغانستان کی خودمختاری، اتحاد اور پائیدار استحکام کے لیے اپنی مشترکہ حمایت کا اعادہ کیا۔
نیویارک میں منعقدہ چوتھی چار فریقی وزارتی ملاقات میں اس بات پر زور دیا گیا کہ افغانستان کو ایک آزاد اور پرامن ریاست کے طور پر مستحکم کرنا وقت کی اہم ضرورت ہے۔ وزرائے خارجہ نے اس امر پر بھی روشنی ڈالی کہ خطے میں تعاون کو فروغ دیے بغیر افغانستان میں دیرپا امن قائم نہیں کیا جا سکتا، اور اس کی کمزور معیشت کو سہارا دینے کے لیے فوری اقدامات اٹھانے ہوں گے۔
مذاکرات میں اس بات پر بھی اتفاق کیا گیا کہ کابل کے ساتھ اقتصادی روابط کا تسلسل ناگزیر ہے، کیونکہ عالمی تنہائی افغان عوام کی مشکلات میں مزید اضافہ کرے گی۔ تجارتی اور ترقیاتی شراکت داری کے علاوہ وزرائے خارجہ نے عالمی برادری سے مطالبہ کیا کہ وہ ہنگامی انسانی امداد کی فراہمی کو تیز کرے تاکہ لاکھوں متاثرہ افراد کی ضروریات پوری کی جا سکیں۔
مشترکہ اعلامیہ میں واضح کیا گیا کہ علاقائی طاقتوں کے نزدیک افغانستان کا امن اور استحکام نہ صرف افغان عوام کے لیے ضروری ہے بلکہ پورے خطے کی سلامتی اور اقتصادی انضمام کے لیے بھی بنیادی حیثیت رکھتا ہے۔
