اسلام آباد — پاکستان نے عالمی سطح پر صحت کی بہتر سہولیات کی فراہمی اور علاقائی و بین الاقوامی تعاون کو فروغ دینے کے اپنے عزم کو ایک بار پھر دہرایا ہے، اس عزم کے ساتھ کہ ملک کے ہر شہری کو معیاری اور مساوی صحت کی سہولتیں فراہم کی جائیں گی۔
یہ یقین دہانی وفاقی وزیرِ صحت سید مصطفیٰ کمال نے قاہرہ میں منعقدہ عالمی ادارہ صحت (WHO) کے مشرقِ وسطیٰ کے علاقائی اجلاس سے خطاب کے دوران کرائی۔
وزیرِ صحت نے اپنے خطاب میں کہا کہ پاکستان اس سال کے موضوع “ایک صحت مند مستقبل کے لیے یکجا — عمل، رسائی اور مساوات” کی مکمل حمایت کرتا ہے، جو حکومت کے اس وژن سے مطابقت رکھتا ہے کہ پالیسی سطح پر کیے گئے وعدوں کو عملی اقدامات میں تبدیل کیا جائے تاکہ عوام کی صحت اور فلاح و بہبود میں حقیقی بہتری لائی جا سکے۔
سید مصطفیٰ کمال نے بتایا کہ پاکستان نے نیشنل ہیلتھ سپورٹ پروگرام کے تحت ایسنشل پیکیج آف ہیلتھ سروسز (EPHS) نافذ کیا ہے، جس کا مقصد بنیادی اور کمیونٹی سطح پر صحت کے نظام کو مضبوط بنانا ہے۔
ان کا کہنا تھا کہ “یہ اقدامات پہلے ہی مثبت نتائج دکھا رہے ہیں۔ پاکستان کا یونیورسل ہیلتھ کوریج انڈیکس 2015 میں 40 تھا جو 2024 میں بڑھ کر 54 تک پہنچ گیا ہے، جو عوامی سطح پر صحت کی سہولتوں میں بتدریج مگر واضح بہتری کو ظاہر کرتا ہے۔”
وفاقی وزیر نے ملک کی صحت کے شعبے میں ایمرجنسی ردِعمل کی صلاحیت بڑھنے پر بھی روشنی ڈالی، اور کہا کہ حکومت نے ملکی سرمایہ کاری کے ساتھ ساتھ بین الاقوامی تعاون میں بھی اضافہ کیا ہے۔ انہوں نے بتایا کہ پاکستان کو پینڈیمک فنڈ کی جانب سے 1.8 کروڑ ڈالر کا نیا مالی تعاون حاصل ہوا ہے، جو نیشنل ایکشن پلان برائے ہیلتھ سیکیورٹی (2024–2028) پر عمل درآمد کے لیے استعمال کیا جائے گا۔ اس منصوبے کا مقصد ملک کی وبائی امراض سے نمٹنے کی تیاری اور صحت کے تحفظ کے نظام کو مزید مؤثر بنانا ہے۔
سید مصطفیٰ کمال نے اپنے خطاب کے اختتام پر کہا کہ پاکستان علاقائی شراکت داروں اور عالمی ادارہ صحت کے ساتھ قریبی تعاون جاری رکھے گا تاکہ “صحت مند، محفوظ اور مساوی مستقبل کی دوڑ میں کوئی بھی پیچھے نہ رہ جائے۔”
