اسلام آباد:
برطانیہ نے رواں سال کی تباہ کن مون سون بارشوں کے اثرات سے نمٹنے کے لیے پاکستان کو £1.33 ملین کی انسانی ہمدردی پر مبنی امداد فراہم کرنے کا اعلان کیا ہے۔
حکام کے مطابق، یہ امدادی پیکج پنجاب، گلگت بلتستان اور خیبر پختونخوا کے سات سیلاب زدہ اضلاع میں دو لاکھ تئیس ہزار سے زائد متاثرہ افراد تک پہنچایا جائے گا۔
یہ معاونت نہ صرف فوری ریلیف بلکہ بحالی کے اقدامات کے لیے بھی استعمال ہوگی۔ اس میں خشک راشن کی تقسیم، سرچ اینڈ ریسکیو ٹیموں کی تعیناتی، موبائل میڈیکل کیمپس کا قیام اور پینے کے پانی کے تباہ شدہ نظام کی بحالی شامل ہیں۔ برطانوی حکام کا کہنا ہے کہ یہ امداد اس عزم کی عکاسی کرتی ہے کہ برطانیہ قدرتی آفات اور انسانی بحرانوں کے دوران پاکستان کے ساتھ کھڑا رہے گا
