نیویارک کے نومنتخب میئر زوہران مامدانی نے ایک تاریخی فیصلہ کرتے ہوئے سابق چیئرپرسن وفاقی تجارتی کمیشن (FTC) اور معروف پاکستانی نژاد امریکی ماہرِ قانون، لینا ملیحہ خان کو اپنی عبوری ٹیم کی شریک سربراہ مقرر کیا ہے۔ یہ اعلان جمعرات کو کیا گیا، جو نیویارک کی سیاست میں ایک اہم موڑ کی حیثیت رکھتا ہے۔
چونتیس سالہ مامدانی، جو نیویارک سٹی کے پہلے مسلمان اور جنوبی ایشیائی میئر بننے جا رہے ہیں، یکم جنوری 2026 کو عہدہ سنبھالیں گے۔ وہ امریکہ کے سب سے بڑے شہر کی قیادت کریں گے، جس کا سالانہ بجٹ 116 ارب ڈالر ہے اور جس کی سرگرمیوں پر پوری دنیا کی نظر رہتی ہے۔
چھتیس سالہ لینا خان تین دیگر تجربہ کار اہلکاروں کے ساتھ مل کر یہ ذمہ داری سنبھالیں گی، جنہیں نیویارک سٹی ہال میں خدمات کا وسیع تجربہ حاصل ہے۔ اپنے بیان میں خان نے نئی انتظامیہ کے وژن پر خوشی کا اظہار کیا۔
"نیو یارک کے عوام نے واضح پیغام دیا ہے کہ اب وقت آ گیا ہے کہ ایسا شہر بنایا جائے جہاں محنت کش لوگ واقعی رہنے کے قابل ہوں،” خان نے کہا۔ "مجھے خوشی ہے کہ میں زوہران کی اس ٹیم کا حصہ بن رہی ہوں جو نیویارک کے لیے ایک نئے دور کا آغاز کرے گی اور ڈیموکریٹک طرزِ حکمرانی کی نئی مثال قائم کرے گی۔”
بائیڈن انتظامیہ کے دوران FTC کی سربراہ کے طور پر لینا خان نے امریکی معاشی پالیسی میں غیر معمولی کردار ادا کیا۔ انہوں نے بڑی کارپوریشنز کے انضمام پر سخت نگرانی بڑھائی اور صارفین کو غیر منصفانہ کاروباری حربوں — جیسے "جنک فیسز” اور لازمی ثالثی شقوں سے بچانے کے لیے اہم اقدامات کیے۔
ان کی قیادت کو جہاں ترقی پسند حلقوں نے سراہا، وہیں بڑی ٹیکنالوجی کمپنیوں، خصوصاً ایمیزون اور مائیکروسافٹ کے خلاف ان کے سخت مؤقف نے سلیکن ویلی میں کچھ حلقوں کو ناراض بھی کیا۔ تاہم، اجارہ داریوں کے خلاف ان کے دلیرانہ اقدامات نے انہیں سیاسی حلقوں میں دونوں جانب سے احترام دلوایا — چاہے وہ ڈیموکریٹس ہوں یا ریپبلکن رہنما جیسے موجودہ نائب صدر جے ڈی وینس اور سابق وائٹ ہاؤس مشیر اسٹیو بینن۔
گزشتہ سال مئی میں ٹکٹ ماسٹر کے خلاف ان کی قیادت میں دائر کیے گئے مقدمے کو امریکی محکمہ انصاف کی جانب سے دو طرفہ سیاسی حمایت حاصل ہوئی۔
لینا خان لندن میں پاکستانی والدین کے گھر پیدا ہوئیں اور 2000 میں اپنے خاندان کے ساتھ امریکہ منتقل ہو گئیں۔ آج وہ جنوبی ایشیائی اور مسلم کمیونٹی کے لیے فخر کی علامت ہیں۔ وہ کولمبیا یونیورسٹی کے معروف کارڈیالوجسٹ ڈاکٹر شاہ رُخ علی کی اہلیہ ہیں۔
