ایران۔اسرائیل جنگ بندی کا خیرمقدم، خطے میں استحکام کی امید
نیویارک (اقوام متحدہ): پاکستان نے ایک بار پھر اس مؤقف کو دہرایا ہے کہ ایران کے جوہری مسئلے کا حل صرف سفارت کاری، بات چیت اور پرامن مذاکرات کے ذریعے ہی ممکن ہے — تصادم کے ذریعے نہیں۔
اقوام متحدہ کی سلامتی کونسل کے اجلاس سے خطاب کرتے ہوئے اقوام متحدہ میں پاکستان کے مستقل مندوب، سفیر عاصم افتخار احمد نے کہا کہ ایران کے جوہری پروگرام سے متعلق خدشات دور کرنے کے لیے مستقل سفارتی روابط اور مکالمے کی ضرورت ہے۔
انہوں نے ایران اور اسرائیل کے درمیان حالیہ جنگ بندی کے اعلان کا بھی خیرمقدم کیا اور اسے موجودہ کشیدہ حالات میں "ایک مثبت اور بروقت پیشرفت” قرار دیا۔
"ہم ان تمام فریقین کو سراہتے ہیں جنہوں نے اس پیشرفت میں تعمیری کردار ادا کیا۔ امید ہے کہ یہ قدم مشرق وسطیٰ میں دیرپا امن اور استحکام کی بنیاد رکھے گا،” سفیر عاصم افتخار نے کہا۔
پاکستان کا ہمیشہ سے یہ مؤقف رہا ہے کہ خطے میں پائیدار امن کے لیے ضروری ہے کہ تمام فریقین تحمل، باہمی احترام، اور مستقل سفارتی ذرائع کا استعمال کریں — اور یہی پیغام پاکستان عالمی فورمز پر مسلسل اجاگر کرتا رہا ہے۔
