پاکستان کے نائب وزیراعظم اور وزیر خارجہ سینیٹر محمد اسحاق ڈار نیویارک پہنچ گئے ہیں جہاں وہ اقوام متحدہ کی سیکیورٹی کونسل کے صدر کی حیثیت سے پاکستان کے سفارتی ایجنڈے کی قیادت کریں گے۔ ان کا یہ سرکاری دورہ ایک ہفتے پر محیط ہوگا۔
اتوار کو جان ایف کینیڈی انٹرنیشنل ایئرپورٹ پہنچنے پر نیویارک میں پاکستان کے مستقل مندوب اور امریکہ میں پاکستانی سفیر نے ان کا استقبال کیا۔ ان کا دورہ 21 جولائی سے 28 جولائی تک جاری رہے گا، جو اقوام متحدہ کی سیکیورٹی کونسل میں پاکستان کے فعال اور مؤثر کردار کو اجاگر کرتا ہے۔
اس دوران اسحاق ڈار اقوام متحدہ کے ہیڈکوارٹرز میں کئی اعلیٰ سطحی دستخطی تقریبات کی قیادت کریں گے جبکہ نیویارک اور واشنگٹن ڈی سی میں دو طرفہ و کثیرجہتی ملاقاتیں بھی کریں گے، جن کا مقصد پاکستان کے خارجہ تعلقات کو مزید مضبوط بنانا ہے۔
ان کے دورے کا ایک اہم پہلو سعودی عرب اور فرانس کی میزبانی میں منعقد ہونے والی “دو ریاستی حل پر بین الاقوامی کانفرنس” میں پاکستان کی نمائندگی ہوگا۔ اس کانفرنس کا مقصد فلسطینی ریاست کے قیام کیلئے عالمی حمایت کو دوبارہ متحرک کرنا ہے جو موجودہ علاقائی کشیدگی کے تناظر میں نہایت اہمیت کی حامل ہے۔
سیکیورٹی کونسل کے صدر کی حیثیت سے اسحاق ڈار “کثیرالجہتی نظام اور تنازعات کے پرامن حل کے ذریعے عالمی امن و سلامتی کے فروغ” پر کھلا مباحثہ بھی چیئر کریں گے، جس میں پاکستان کی اس پالیسی کو اجاگر کیا جائے گا کہ عالمی تنازعات کا حل بات چیت اور سفارتکاری کے ذریعے ہی ممکن ہے۔
وہ مشرق وسطیٰ کی صورتحال اور فلسطینی مسئلے پر سیکیورٹی کونسل کے سہ ماہی کھلے مباحثے کی صدارت بھی کریں گے، جس میں پاکستان کی دیرینہ پالیسی کو دہرایا جائے گا کہ فلسطینی تنازع کا منصفانہ اور پرامن حل ہی پائیدار امن کا راستہ ہے۔
علاوہ ازیں، وہ اقوام متحدہ اور اسلامی تعاون تنظیم (OIC) کے درمیان تعاون بڑھانے کیلئے ایک خصوصی بریفنگ کی بھی قیادت کریں گے، جس کا مقصد عالمی امن اور سلامتی کے فروغ کیلئے ان اداروں کے درمیان ہم آہنگی کو مضبوط بنانا ہے۔
اس دورے کا مصروف شیڈول اس بات کی عکاسی کرتا ہے کہ پاکستان اپنی سیکیورٹی کونسل کی صدارت کے دوران عالمی سفارتکاری میں فعال کردار ادا کرنے اور کثیرالجہتی نظام کو تنازعات کے حل کا ذریعہ بنانے کیلئے پرعزم ہے۔
